Endurskoðun AGS strandar á pólitík

Steingrímur J. Sigfússon fjármálaráðherra segist ekki hissa á orðum Dominique Strauss-Kahn, framkvæmdastjóra Alþjóðagjaldeyrissjóðsins (AGS), um að tryggja þurfi meirihlutastuðning í stjórn sjóðsins áður en verði af endurskoðun efnahagsáætlunar Íslands. Hann sé frekar hissa á að Strauss-Kahn hafi sagt þetta opinberlega.

„Það má lesa það úr orðum hans að málið strandi á pólitíkinni, starfsfólk sjóðsins metur það þannig að ekkert standi efnislega í vegi fyrir endurskoðuninni. Það vantar pólitískan stuðning og það hefur maður lengi vitað.“

Strauss-Kahn sagði, í samtali við Bloomberg, að ekki yrði nein endurskoðun án meirihluta í stjórn. „Ef enginn er meirihlutinn höldum við ekki áfram. Sjálfur tel ég að gagnlegt væri að halda áfram með málið núna. En ég get ekki sagt fyrir um hvort meirihluti er fyrir því.“ Steingrímur segir að framkvæmdastjórinn hafi viðrað þessi sjónarmið við Íslendinga áður.

Engar formlegar viðræður hafa farið fram við Breta og Hollendinga frá því að upp úr viðræðum slitnaði 5. mars. Steingrímur segir þó óformleg samskipti hafa átt sér stað.

„Menn eru að tala saman yfir línuna og við vonumst til að hreyfing komi á málið eftir páska. Það átta sig allir á því að ef gera á tilraun til að leysa málið verður hún að vera fljótlega eftir páska.“ Steingrímur segir að annars muni málið líklega frestast fram yfir kosningar í Bretlandi og Hollandi.

Spurður hvaða áhrif það hefði á stöðu Íslands segir Steingrímur það skipta máli hvernig málum er búið. Ef sátt sé um að setja málið í bið þá hafi það minna neikvæð áhrif en ef viðræður væru upp í loft. Ef ekki náist að klára málið verði reynt að búa svo um hnútana að sátt náist um frestun.

Steingrímur segist vonast til að endurskoðun AGS fari fram sem fyrst, hvað sem samningum um Icesave líður. Hann er bjartsýnn á að það gangi eftir. Best væri þó að ljúka Icesave-málinu um leið.

kolbeinn@frettabladid.is