Eyrarrósin afhend á Bessastöðum

Eyrarrósin verður afhent við hátíðlega athöfn á Bessastöðum í dag. Tónlistarhátíðin Bræðslan á Borgarfirði eystra, Eiríksstaðir í Haukadal og Skjaldborg - hátíð íslenskra heimildarmynda á Patreksfirði eru þau þrjú verkefni sem tilnefnd eru að þessu sinni.

Eyrarrósin er sérstök viðurkenning fyrir framúrskarandi menningarverkefni á landsbyggðinni sem Listahátíð í Reykjavík, Byggðastofnun og Flugfélag Íslands hafa sett á stofn. Verndari Eyrarrósarinnar er Dorrit Moussaieff forsetafrú og mun hún afhenda viðurkenninguna og verðlaunagripinn.

Verkefnið sem fær Eyrarrósina hlýtur verðlaunafé að upphæð 1,5 miljónir króna og verðlaunagrip sem Steinunn Þórarinsdóttir myndlistarkona hefur gert.