Hræðsla þegar einn gleymdist

Töluverð hræðsla greip um sig í hópi ríflega fjörutíu leiklistarnema úr Menntaskólanum við Sund þegar þeim bárust fréttir af gosinu í miðju skólaferðalagi.

Hópurinn var staddur í félagsheimilinu Gunnarshólma í Austur-Landeyjum. Kolbrún Björt Sigfúsdóttir og Erlingur Grétar Einarsson, leikstjórar verksins sem hópurinn hafði nýlokið sýningum á, sáu um það að koma hópnum út í rýmingarrútu og á Hvolsvöll. Fólkið þurfti að skilja föggur sínar eftir að miklu leyti, auk þess sem fáir voru ökufærir og því urðu einhverjir bílar eftir á staðnum líka.

Kolbrún segir hópinn hafa verið nokkuð skelkaðan og að einhverjir hafi talið að þetta yrði þeirra síðasta. Sá ótti var þó skjótt kveðinn niður enda að mestu ástæðulaus.

Þá var fólki mjög brugðið þegar komið var á Hvolsvöll og í ljós kom að einn pilturinn, góðglaður mjög, hafði orðið eftir í félagsheimilinu. Hann hafði illa gert sér grein fyrir ástandinu og ákvað að fara aftur inn í húsið að sofa. Þegar það uppgötvaðist að hann vantaði í hópinn var lögregla send eftir honum og skilaði honum á Hvolsvöll skömmu síðar. Nemarnir voru í kjölfarið allir ferjaðir til Reykjavíkur, en leikstjórarnir tveir fengu inni hjá ættingja Erlings í sveitinni. - sh