Lögreglumaður sýknaður af ákæru um ofbeldi

Lögreglumaðurinn Garðar Helgi Magnússon var sýknaður í Héraðsdómi Reykjavíkur í morgun en hann var ákærður af ríkissaksóknara fyrir brot í opinberu starfi og líkamsárás.

Hann átti að hafa að morgni sunnudagsins 18. janúar 2009 farið offari við framkvæmd lögreglustarfans og ekki gætt lögmætra aðferða.

Í ákæruskjali sagði að hann hefði, sem stjórnandi lögregluaðgerðar, fyrirskipað öðrum lögreglumanni að aka með Edward Alexander Eiríksson, frá Austurstræti út á Granda í Reykjavík þar sem maðurinn var skilinn eftir.

Þá átti Garðar að hafa á leiðinni út á Granda þrýst hné sínu á háls Edwards þar sem hann lá handjárnaður í tökum lögreglu á maganum á gólfi lögreglubifreiðar.

Garðar var sýknaður öllum sökum í Héraðsdómi Reykjavíkur í morgun en hann hefur starfað sem lögreglumaður þrátt fyrir rannsókn og réttarhöld í málinu.