Listi Grindvíkinga: Vilji bæjarbúa virtur að vettugi

Listi Grindvíkinga, nýtt óháð framboð, bauð öllum oddvitum í Grindavík að mynda samstjórn allra flokka í bæjarfélaginu en því var hafnað að sögn Kristínar Maríu Birgisdóttur oddvita framboðsins. Framsóknarflokkurinn og Sjálfstæðisflokkurinn mynduðu meirihluta í gærkvöldi. Hún segir að flokkarnir hafi virt vilja bæjarbúa að vettugi.

Mikið hefur gengið á í bæjarpólitíkinni í Grindavík undanfarin fjögur ár og til að mynda fjórir meirihlutar verið myndaðir.

Framsóknarflokkurinn fékk tæplega 34% atkvæða í kosningunum og þrjá bæjarfulltrúa en var áður með tvo bæjarfulltrúa. Listi Grindvíkinga fékk 25% atkvæða og tvo bæjarfulltrúa, Sjálfstæðisflokkur einn og Samfylkingin einn.

„Bæjarbúar í Grindavík gerðu kröfu um endurnýjun. Framsóknarflokkur boðaði nýtt fólk og breytta tíma. Engu að síður sáu þeir aldrei ástæðu til að tala við Lista Grindvíkinga," segir Kristín María í tilkynningu.

„Við lýsum furðu okkar á að Framsóknarflokkur hafi ekki gefið þessu tækifæri, í það minnsta rætt möguleikann. Eftir að hafa heyrt gríðarlegar óánægjuraddir í bæjarfélaginu vegna viðræðna Framsóknarflokks og Sjálfstæðisflokks fannst okkur íbúar Grindavíkur eiga það skilið að kröfum þeirra yrði mætt og að mynduð yrði samstjórn."