Byrjað að undirbúa heimferð

Íslenska rústabjörgunarsveitin á Haítí fór í könnunarleiðangra um miðborg höfuðborgarinnar Port-au-Prince í gær til að kanna hvort einhver fyndist þar á lífi í rústunum. Leitin hafði engan árangur borið í gærkvöldi.

Í utanríkisráðuneytinu er byrjað að huga að heimför sveitarinnar, sem verður líklega í þessari viku. Tímasetningin liggur ekki fyrir, en að sögn Ólafar Snæhólm Baldursdóttur hjá Landsbjörgu er þumalputtareglan sú að sveitir fari að tygja sig heim þegar 48 klukkustundir eru liðnar frá því að lifandi manneskja finnst í rústum. Þegar séu nokkrar sveitir farnar heim.

Sjálfboðaliðar Rauða kross Íslands pökkuðu í gærkvöldi þúsund skyndihjálparpökkum fyrir teymi sem veita eiga slösuðum aðstoð á Haítí. Verða gögnin send með vélinni sem gert er ráð fyrir að muni flytja íslensku sveitina heim. Þá verður einnig sendur loftkælibúnaður fyrir sjúkraskurðstofur og annar búnaður fyrir sjúkrahús.

Þá hefur athafnamaðurinn Jón Ólafsson sent 230 tonn af flöskuvatni á hamfarasvæðin. Áætlað er að vatnið berist til Haítí í dag.