Reyndi að lokka litla stelpu upp í bíl í Langholtshverfi

Ókunnur eldri maður reyndi að lokka 8 ára gamla stúlku upp í bíl til sín í Langholtshverfi seinni partinn í dag. Stúlkan hljóp í burtu og lét vita heima hjá sér. Þetta kemur fram í bréfi sem Hreiðar Sigtryggsson, skólastjóri í Langholtsskóla, sendi forráðamönnum barna í skólanum. Bréfið er birt í heild á fréttavefnum Pressunni.

Atvikið átti sér stað á gatnamótum Dyngjuvegar og Hjallavegar. Hreiðar segir í bréfinu að viðbrögð stúlkunnar hafi verið hárrétt. Foreldrar hafi kallað umsvifalaust til lögreglu og látið skólann vita af atburðinum. Í bréfinu hvetur Hreiðar forráðamenn til að brýna fyrir börnunum að fara ekki upp í bíl hjá ókunnugum og láta fullorðið fólk vita þegar svona eigi sér stað.

Þegar Vísir hafði samband við lögregluna fengust engar upplýsingar um þetta tiltekna mál. Þær upplýsingar fengust þó að lögreglan tæki málum af þessu tagi mjög alvarlega.