Ekki alvarlega slösuð

Kona sem var farþegi í jeppa sem lenti í árekstri á Suðurlandsvegi í morgun er ekki talin alvarlega slösuð, að sögn lögreglu. Búið er að opna fyrir umferð á slysstað.

Áreksturinn varð klukkan rúmlega níu í morgun á 2+1 kafla Suðurlandsvegar vestan við Sandskeið. Þar eru tvær akreinar fyrir umferð sem er á leið austur.

Ökumaður á bifreið sem ekið var til vesturs tók fram úr og fór yfir á öfugan vegarhelming og lenti á hlið jeppa sem kom akandi á móti og var á vinstri akrein. Ökumenn bifreiðanna sakaði ekki en kona sem var farþegi í jeppanum var flutt með sjúkrabifreið á slysadeild. Meiðsl hennar eru sem fyrr segir ekki talin alvarleg.

Veginum var lokað um stund eftir slysið og myndaðist töluvert umferðaröngþveiti á meðan unnið var á slysstað. Að sögn lögreglu hefur verið opnað fyrir umferð á nýjan leik.