Aquilani: Stutt í að ég komist í mitt besta form

Ítalinn Alberto Aquilani viðurkennir að það hefði verið auðveldara að aðlagast lífinu hjá Liverpool ef liðinu gengi betur.

Aquilani er rétt farinn að fá tækifæri í liðinu þó svo það sé nokkuð síðan hann fékk sig góðan af langvinnum meiðslum.

„Auðvitað hefði ég frekar viljað koma inn í lið sem er að vinna leiki. Þegar ég varð heill gekk liðinu illa. Það gerði þetta allt erfiðara. Það hefði verið auðveldara að aðlagast öllu ef liðið væri á sigurbraut. Það er ekki málið og því er pressa á mér að standa mig strax vel. Ég veit ég get gert mun betur en ég hef sýnt hingað til," sagði Ítalinn.

„Ég er enn að vinna í forminu mínu og það tekur mig tíma að komast í sama form og ég var áður en ég meiddist. Ég held samt að það sé ekkert allt of langt í það."