Lítið sást af gosinu í nótt

Gosóróinn undir Fimmvörðuhálsi er hættur að aukast nema hvað af og til bætir aðeins í hann, en svo hjaðnar hann aftur. Einhverjar gufusprengingar urðu í gærkvöldi, líkt og í gærmorgun, og fór strókurinn þá upp í nokkurra kílómetra hæð.

Ekkert hefur sést til gossins í nótt, enda lélegt skyggni og slæmt veður á slóðum gosins. Hraun hefur á kafla flætt yfir gönguleiðina vinsælu, þannig að þar verður að stika upp á nýtt fyrir sumarið.

Ekki hafa borist fregnir af teljandi öskufalli. Vegir eru enn lokaðir í Þórsmörk, Emstrur, Tindfjöll og á Fimmvörðuháls.