Bygging á nýju fangelsi fær græna ljósið

„Þetta er ánægjulegur áfangi í fangelsismálum hér á landi," segir Ragna Árnadóttir dómsmálaráðherra um samþykkt ríkisstjórnarinnar í gær um að dómsmálaráðuneyti verði heimilað að auglýsa útboð nýrrar fangelsisbyggingar á höfuðborgarsvæðinu svo fremi sem fjármögnun fáist.

Að sögn ráðherra verður leitað til lífeyrissjóða um fjármögnun. Gangi hún eftir muni ríkið eignast húsnæðið að einhverjum tíma liðnum. Hegningarhúsið við Skólavörðustíg og fangelsið í Kópavogi verði þá selt.

„Þetta hefur verið í undirbúningi um töluvert skeið," segir Ragna. Hún segir það í höndum fjármálaráðuneytis að kanna möguleika á fjármögnuninni og málið verði unnið áfram í samvinnu þess og dómsmálaráðuneytis.

Í nýrri skýrslu Ríkisendurskoðunar um stöðu fangelsismála hér er mælt með að hafist verði handa við byggingu nýs gæsluvarðhalds- og móttökufangelsis á höfuðborgarsvæðinu þar sem óhagkvæmni og kostnaður fylgi stöðugum flutningum gæsluvarðhaldsfanga að og frá Litla-Hrauni. Að jafnaði séu fjórir fangaverðir bundnir við slíka flutninga á hverjum degi.

Þá beinir Ríkisendurskoðun því til heilbrigðisráðuneytis að það feli Landlæknisembættinu að meta þjónustu við fanga með geðræn vandamál og bregðist við í samræmi við niðurstöðurnar. Fyrir hafi komið að þörfum geðveikra fanga sé ekki mætt með viðeigandi hætti og nánast útilokað hafi reynst að fá langtímainnlögn fyrir þá á geðsviði Landspítala.

Ríkisendurskoðun leggur áherslu á að fjármagn fylgi lögbundnum verkefnum svo að Fangelsismálastofnun hafi fjárhagslega burði til að sinna þeim með viðunandi hætti. Jafnframt að löggjafinn veiti forstjóra stofnunarinnar umboð til að skipa forstöðumenn fangelsa. Þannig verði til heildstæð stjórnsýslustofnun þar sem vald, umboð og ábyrgð fara saman.

Varðandi samþykkt ríkisstjórnarinnar í gær segir Páll E. Winkel, forstjóri Fangelsismálastofnunar, að bygging gæsluvarðhalds- og móttökufangelsis á höfuðborgarsvæðinu verði mikill áfangi ef og þegar hún gangi eftir.

„Þetta er nauðsynlegt fyrsta skref," bætir hann við. „Auk þessa þarf að bæta við starfsmanna- og móttökueiningu á Litla-Hrauni, þannig að hægt sé að fjölga rýmum þar."

jss@frettabladid.is