Hafnar fullyrðingum Frjálslynda flokksins

„Það er helber lygi að þarna sé um að ræða eitthvert einkahlutafélag mitt,“ segir Ólafur F. Magnússon, borgarfulltrúi F-listans í Reykjavík, um tilkynningu sem Frjálslyndi flokkurinn sendi frá sér í gær. Ólafur telur tilkynninguna runna undan rifjum lítillar klíku í flokknum, sem trúlega samanstandi af færra fólki en séu á bak við Borgarmálafélag F-Lista í borginni.

Í tilkynningunni áréttar Frjálslyndi flokkurinn að Ólafur sé ekki í flokknum og að heilsíðuauglýsing sem hann birti í Fréttablaðinu í gær sé ekki á vegum F-listans í borginni. „Auglýsingin er sögð í nafni Borgarmálafélags F-lista. Af því tilefni ítrekar Frjálslyndi flokkurinn að það félag hefur ekkert með Frjálslynda flokkinn að gera eða Borgarmálafélag Frjálslynda flokksins í Reykjavík. Félag það sem Ólafur kallar „Borgarmálafélag F-lista“ er einkahluta­félag sem Ólafur stofnaði á valdatíma sínum sem borgarstjóri til þess eins að færa til fjárstyrk af hálfu borgarinnar sem áður hefur jafnan runnið til Frjálslynda flokksins,“ segir í tilkynningunni.

Ólafur segist furða sig á að fjölmiðlar hafi í gær kosið að éta upp „gamla lygi“ um Borgarmálafélagið. Hann bendir á að kjördæmaráð Frjálslynda flokksins hafi lýst eindregnum stuðningi við hann og gefur ekki mikið fyrir tilkynninguna sem send var út í gær. - óká