Freddie Ljungberg við það að semja við Celtic

Sænski leikmaðurinn Freddie Ljungberg ætlar að æfa með skoska liðinu Celtic á næstunni og stjóri liðsins Neil Lennon vonast til þess að leikmaðurinn muni skrifa undir samning áður en langt um líður. Ljungberg er 33 ára gamall og er þekkastur fyrir frábæra frammistöðu sína með Arsenal á árum áður en það hefur minna farið fyrir kappanum síðustu árin.

„Ljungberg kemur í kvöld (í gær) en hann er ekkert að koma í einhverja reynslu. Við ætlum bara að fá að skoða hann og hann ætlar að skoða okkur," sagði Neil Lennon eftir 2-0 sigur Celtic á St. Johnstone í skosku úrvalsdeildinni í gær.

„Við heyrðum í umboðsmanni hans fyrir þremur eða fjórum vikum. Ég tel ekki að hann sé búinn því hann hefur alltaf haldið sér í góðu formi. Hann var mikið meiddur hjá West Ham en undanfarna 18 mánuði þá hefur hann spilað mikið í Bandaríkjunum," sagði Lennon en Ljungberg hefur spilað með Seattle Sounders og Chicago Fire í bandarísku deildinni.

Deildin er nú komin í frí og eins og aðrir þekktir leikmenn í deildinni þá hefur Ljungberg áhuga á að spila í millitíðinni í Evrópu.

„Hann er búinn að vera gæðaleikmaður í langan tíma og hefur öðlast mikla reynslu. Hann hefur kannski misst eitthvað en er enn frábær fótboltamaður. Hann er stórt nafn en ég hef ekki áhyggjur af því þar sem að hann ætti að geta hjálpað liðinu mínu mikið," sagði Lennon.