Fyrsta skrefið í átt að fyrningu í sjávarútvegi

Útgerðarmenn óttast að skötuselslögin séu aðeins fyrsta skrefið í átt að svonefndri fyrningarleið í sjávarútvegi. Næst þegar þorskkvóti verði aukinn fari hann ekki til kvótaeigenda heldur til ríkisins.

Skötuselskvóti verður aukinn um tvö þúsund tonn á næstu tveimur árum.

Aukningunni verður ekki skipt hlutfallslega á milli kvótaeigenda heldur mun sjávarútvegráðherra úthluta veiðiheimildum gegn gjaldi.

Útgerðamenn segja að með þessu sé búið að kollvarpa núverandi fiskveiðistjórnunarkerfi.

„Þetta varðar grundvallaratriði hvernig fiskveiðistjórnun við ætlum að hafa hérna. Ætlum við að byggja á aflahlutdeild og aflamarkskerfi þar sem að þeir sem fjárfesta í greininni hafa öruggan veiðirétt eða ætlum við að fara svokallaða fyrningarleið og uppboð með tilheyrandi óvissu og óáran," segir Friðrik J. Arngrímsson, framkvæmdastjóri LÍÚ.

Þorskkvótinn hefur verið skertur um mörg þúsund tonn á síðustu árum með það fyrir augum að vernda og byggja upp stofninn. Útgerðarmenn óttast að þegar kvótinn verður aukinn á ný renni það beint til ríkisins.

„Því hefur verið hótað að ef okkur tekst að byggja upp fiskistofnana sem við erum að gera núna með því að taka á okkur skerðingar þá verði farið með það með sama hætti og nú á að fara með skötuselinn. Það er auðvitað hlutur sem við getum ekki búið við," segir Friðrik.