Vegfarendur aðstoðaðir í Víkurskarði

Mikil ofankoma hefur verið á Eyjafjarðarsvæðinu frá því í gærkvöld og uppúr miðnætti óskuðu vegfarendur á Víkurskarði aðstoðar vegna ófærðar og óveðurs.

Björgunarsveitarmenn úr Björgunarsveitinni Týr á Svalbarðsströnd, Þingey í Þingeyjarsveit og Súlur frá Akureyri hafa verið að störfum í alla nótt við að hjálpa fólki við að komast niður. Notuðst þeir við 5 björgunarsveitarbíla og snjóbíl. Fólkið var ferjað niður af Skarðinu og þaðan flutt til Akureyrar í björgunarsveitarbílum og rútu sem hafði verið send til móts við hópinn.

Tæplega 20 bílar voru skildir eftir á Víkurskarði og um 50 manns flutt úr þeim til Akureyrar. Vegir um Víkurskarð og Grenivík eru ófærir, þá er þæfingur á leiðinni til Dalvíkur og leiðin á milli Dalvíkur og Ólafsfjarðar er lokuð vegna snjóflóða.