VR harmar að stjórnarmenn tengist Nýju Íslandi

Meirihluti VR sendi frá sér ályktun í dag þar sem þeir segjast harma að nokkrir stjórnarmenn í félaginu tengist samtökunum Nýtt Ísland. VR segir á heimasíðu sinni að samtökin beini kröftum sínum að því að brjóta félagið niður.

Meðal þeirra sem tengjast Nýju Íslandi er Bjarki Steingrímsson, en hann var varaformaður VR þar til stjórnin lagði fram vantrauststillögu vegna ræðu sem hann hélt á kröfufundi Nýja Íslands á síðasta ári. Þá voru þær útskýringar gefnar að trúnaðarbrestur og samstarfsörðugleikar hefðu komið upp.

Svo segir orðrétt í ályktun VR: „Samtökin Nýtt Ísland lögðu upp með það að ná völdum í VR í kosningum um forystu félagsins á síðasta ári en formannsefni þeirra náði ekki kjöri. Síðan hafa samtökin beint spjótum sínum að VR, m.a. með dylgjum og óhróðri á vefsíðu samtakanna. Hvað vakir fyrir þeim vitum við ekki en hins vegar er ljóst að þrír stjórnarmenn í VR, Bjarki Steingrímsson, Guðrún Jóhanna Ólafsdóttir og Ragnar Þór Ingólfsson, hafa sterk tengsl við þessi samtök."

Meirihluti stjórnar VR segist svo harma að stjórnarmenn í félaginu leggi nafn sitt við samtök af því tagi sem hér um ræðir.