Ókeypis flug reyndist gabb

Fréttablaðið brá á leik á skírdag, 1. apríl, og birti tvær ósannar fréttir í því skyni að fá landsmenn til að hlaupa apríl.

Sú fyrsta snerist um hollenska hernaðarfyrirtækið E.C.A. sem sagt var ætla að bjóða fólki í ókeypis flug yfir gosstöðvarnar á Fimmvörðuhálsi í stærðarinnar herflugvélum.

Í hinni var fullyrt að Linda Björg Árnadóttir, fagstjóri fatahönnunar hjá Listaháskóla Íslands, hefði verið ráðin listrænn ráðunautur í búningadeild Ríkissjónvarpsins og að hún hygðist sýna afrakstur fyrstu búningagerðar sinnar í húsakynnum Listaháskólans.

Þátttakendum í aprílgöbbunum er hér með þakkað liðsinnið.