Helgi leiðir framsóknarmenn í Árborg

Framboðslisti Framsóknarfélags Árborgar fyrir sveitarstjórnarkosningar í vor var samþykktur á félagsfundi í gærkvöldi. Helgi Sigurður Haraldsson, svæðisstjóri, leiðir listann. Bæjarfulltrúar flokksins sækjast ekki eftir endurkjöri og skipa heiðurssæti framboðslistans.

Framsóknarflokkurinn fékk tvo bæjarfulltrúa kjörna í kosningunum fyrir fjórum árum, Sjálfstæðisflokkurinn fjóra, Samfylkingin tvo og VG einn.

Flokkurinn hefur verið í meirihluta í bæjarfélaginu undanfarin ár. Eftir kosningarnar 2006 mynduðu framsóknarmenn meirihluta með sjálfstæðismönnum sem sprakk nokkrum mánuðum síðar. Í kjölfarið mynduðu Framsóknarflokkurinn, Samfylkingin og VG nýjan meirihluta.