Vilja ættleiða barn

Leikararnir Scarlett Johansson og Ryan Reynolds eru að sögn Star Magazine að íhuga að ættleiða barn annaðhvort frá Eþíópíu eða Líbíu. Hjónakornin eiga að hafa átt fund með starfsmanni ættleiðingarskrifstofu fyrir skemmstu, en móðir Johansson ættleiddi nýlega litla stúlku frá Eþíópíu. Reynolds á einnig ættleiddan bróður og er þetta því parinu hjartans mál.

„Þau vilja ættleiða barn áður en þau eignast sitt eigið. Þau eru mjög hamingjusöm saman og þegar þau giftu sig lofuðu þau hvort öðru að þau mundu ekki tala um sambandið við fjölmiðla. Þau hafa til að mynda aldrei mætt saman á opinbera viðburði og þau passa upp á það að það líði aldrei meira en tvær vikur á milli þess sem þau hitta hvort annað,“ var haft eftir ónafngreindum vini hjónanna.