WHO biður Evrópubúa að halda sig inni vegna öskufalls

Talsmaður Alþjóðaheilbrigðisstofnunarinnar (WHO) hefur hvatt Evrópubúa til þess að halda sig innandyra vegna öskufallsins sem berst þangað frá Eyjafjallajökli. Þetta kom fram á fréttasíðunni timesofindia.com.

Þar er haft eftir David Espstein að áhrif öskufallsins séu ókunn og því sé best fyrir almenning að halda sig innandyra.

Þá bendir hann á að það sé meiri hætta fyrir þá sem eru með undirliggjandi sjúkdóma eins og astma eða aðra lungnatengda sjúkdóma að anda að sér öskufallinu.

Þá hafa heilbrigðisyfirvöld í Skotlandi einnig varað íbúa landsins við hugsanlegri hættu á öskufallinu.

Bretar eru þó ekki sammála þessari greiningu og segja að það sé afar lítil hætta á því að rykið falli til jarðar og því sé ekki um sérstakt áhyggjuefni að ræða.