Þrír búnir að kjósa

Þrír eru búnir að kjósa hjá Sýslumanninum í Reykjavík í atkvæðagreiðslu um Icesave lögin. Utankjörfundaratkvæðagreiðslan hófst í morgun klukkan níu.

Kjósanda sem ekki getur kosið á kjördag, er heimilt að greiða atkvæði utan kjörfundar frá og með þeim degi til kjördags. Á vef sem opnaður var í tilefni af þjóðaratkvæðagreiðslunni kemur fram að hægt er að kjósa hjá öllum sýslumönnum á landinu, á aðalskrifstofum eða í útibúum þeirra.

Atkvæðagreiðsla utan kjörfundar á erlendri grundu hófst einnig í dag á vegum utanríkisráðuneytisins.

Hjá sýslumanninum í Reykjavík er hægt að kjósa frá klukkan níu á morgnana til klukkan hálffjögur á virkum dögum. Um helgar verður hægt að kjósa frá klukkan tvö til fjögur. Þann 10. febrúar mun Sýslumaðurinn í Reykjavík flytja kjörstað sinn í Laugardalshöllina og þá verður hægt að kjósa til klukkan tíu á kvöldin.