Forsætisráðherra telur að landsdómsmálið spilli ekki samstarfi

Jóhanna Sigurðardóttir forsætisráðherra fundar með leiðtogum stjórnarandstöðunnar núna klukkan fjögur um mögulegt samstarf milli stjórnar og stjórnarandstöðu. Jóhanna var spurð að því í dag hvort að hún óttaðist að að landsdómsmálið yrði til þess að spilla samstarfi ríkisstjórnarinnar við Sjálfstæðisflokkinn. Hún sagðist ekki telja svo vera.

„Ég held að menn geti ekki látið landsdómsmálið þvælast fyrir sér í þessu efni. Það eru stór og brýn úrlausnarefni sem blasa við okkur og við getum ekki látið reiðina vera að krauma út af því máli. Við verðum að setja það mál til hliðar og leysa þessi brýnu hagsmunamál sem fólkið er að kalla eftir," sagði Jóhanna að loknum ríkisstjórnarfundi í morgun.

Sjálfstæðismenn telja afar brýnt að gripið verði til aðgerða vegna skuldavanda heimila sem fyrst. Ólöf Nordal, varaformaður Sjálfstæðisflokksins, skoraði meðal annars á þingheim í dag að málið yrði tekið á dagskrá sem fyrst. Undir það tóku fleiri þingmenn Sjálfstæðisflokksins, Róbert Marshall, þingmaður Samfylkingarinnar, og Höskuldur Þórhallsson, þingmaður Framsóknarflokksins.