Kattliðugir kroppar í hot jóga - myndir

Vísir fékk að fylgjast með stæltum liðsmönnum meistarflokks karla í Breiðablik í Hot-jógatíma, sem fór fram í 42 gráðu upphituðum sal í Sporthúsinu.

Ólafur Helgi Kristjánsson þjálfari liðsins og jógakennarinn Jóhanna Karlsdóttir gáfu sér tíma til að ræða hvernig tímarnir leggjast í Breiðabliksmenn.

„Í fyrsta lagi var ég náttúrulega að hugsa þetta út frá þessu líkamlega og það er að fá mótvægi við „hardcore" æfingar sem gleymast stundum," segir Ólafur þjálfari.

„Í öðru lagi að slaka á og anda og allt þetta. Hvor tveggja er mjög gott og strákarnir eru að fíla þetta alveg rosalega vel. Þeir eru mjög ánægðir og finna nú þegar á sér mun bara eftir fjóra tíma," segir Ólafur.

„Það er líka mikilvægt fyrir þá að komast í annað umhverfi þar sem stundaðar eru öðurvísi æfingar. Það var ný áskorun að gera hluti sem þeir eru ekki góðir í en þurfa að takast á við. Upplifunin er mjög jákvæð," bætir hann við.

Í skýjunum með strákana

„Þeir komu mjög á óvart hversu góðir þeir voru strax í því að ná þessum stöðum og þeir vanda sig vel," segir Jóhanna.

„Þessar æfingar eru mjög sniðugar fyrir íþróttafólk almennt og sérstaklega þegar að hné þurfa að vera vel smurð því þessar æfingar voru upprunalega settar saman af manni sem átti við alvarleg hné-meiðsl að glíma."

„Æfingarnar liðka og opna öll liðamótin og sérstaklega hrygg, mjaðmir og hné og vöðvaflokkar í kringum þessi liðamót eru styrktir og mýktir upp með teygjum.

„Hot-jóga er ekki bara teygjur í hita eins og margir halda heldur eru þetta æfingar sem taka á öllu í bland; vöðvar styrktir, liðamót liðkuð, jafnvægi og blóðrás eflt. Hot-jóga á við alla en auðvitað bara líka spurning um hvað fólk hefur gaman af," segir Jóhanna.-elly@365.is

HotYoga.is