Niðurskurði á Austurlandi harðlega mótmælt

Stjórn Sambands sveitarfélaga á Austurlandi (SSA) mótmælir harðlega niðurskurðaráformum stjórnvalda, er varða Heilbrigðisstofnun Austurlands eins og þau koma fram í framlögðu frumvarpi til fjárlaga 2011.

Í tilkynningu frá stjórninni segir að í kjölfar mikilla sparnaðaraðgerða undarin tvö ár sé nú boðaður 22,1 prósenta niðurskurður á heildarframlögum til stofnunarinnar, sem rekur starfsstöðvar í 11 byggðarlögum, og 52 prósenta niðurskurður á sjúkrasviði stofnunarinnar. Stjórnin segir þessi áform ekkert annað en aðför að heilbrigðisþjónustunni á starfssvæði HSA sem afhjúpi virðingarleysi heilbrigðisyfirvalda til íbúa í fjórðungnum og skerðir velferðarþjónustu á svæðinu.

„Ekki liggur fyrir mat á samfélagslegum áhrifum, sem boðaður niðurskurður mun hafa í för með sér á Austurlandi. Vafalaust munu áformin leiða til aukins atvinnuleysis með tilheyrandi kostnaði fyrir ríkissjóð, (og) íbúafækkunar með tilheyrandi tekjutapi fyrir sveitarsjóði og fýsileiki svæðisins til búsetu og atvinnurekstrar minnkar til muna. Þá er ótalinn sá öryggisþáttur sem skert aðgengi að heilbrigðisþjónustu í heimabyggð er, að ógleymdum auknum kostnaði íbúanna við að sækja þjónustu um lengri veg," segir ennfremur.

„Stjórn SSA átelur heilbrigðisráðuneytið fyrir samráðsleysi við ákvörðun um áformaða grundvallarbreytingu á heilbrigðisþjónustu í landshlutanum og skorar á heilbrigðisráðherra að endurskoða boðuð niðurskurðaráform. Jafnframt er heitið á alþingismenn NA - kjördæmis að beita sér fyrir að endurskoðun á fjárheimildum til HSA, eins og þau liggja nú fyrir."