Greiðslur til feðra dragast saman

Sparnaðaraðgerðir Fæðingarorlofssjóðs hafa bitnað einna mest á meðalútgjöldum til feðra.

Munur á greiðslum Fæðingarorlofssjóðs til mæðra og feðra hefur farið minnkandi frá því feðrum var fyrst veitt feðraorlof árið 2001. Meðalgreiðslur til feðra voru 82,5 prósentum hærri en greiðslur mæðra þetta fyrsta ár sem báðir foreldrar gátu tekið orlof vegna fæðingar. Bráðabirgðatölur ársins 2010 gefa til kynna að bilið milli feðra og mæðra sé enn að minnka og eru meðalgreiðslur til feðra samkvæmt þessum tölum 29,1% hærri en útgjöld til mæðra.

Þetta kemur fram í nýútkominni skýrslu Fæðingarorlofssjóðs

Líkt og með almenna launaþróun á Íslandi þá eru meðalgreiðslur til feðra og mæðra talsvert frábrugðnar. Það er ekki hægt að túlka tölur Fæðingarorlofssjóðs sem nákvæman mælikvarða á almenna launaþróun.

Greiðslur sjóðsins geta hins vegar gefið sterka vísbendingu um launamun kynjanna.

Athuga ber að aðeins 80 prósent af heildartekjum einstaklinga eru notuð til útreikninga á orlofsgreiðslum auk þess sem hámark er á greiðslum úr Fæðingarorlofssjóði og getur það haft áhrif á heildarmyndina.

Skerðing á hámarki greiðslna úr Fæðingarorlofssjóði virðist hafa orðið til þess að færri feður taka fæðingarorlof þar sem þeir eru oftar með hærri laun en mæðurnar. Þeir þrír mánuðir sem bundnir eru feðrum standa eftir ónýttir þar sem ekki er heimilt að færa orlofsréttinn yfir til mæðra.

Mæður taka eftir sem áður það þriggja mánaða orlof sem þeim er bundið, auk þeirra þriggja mánaða sem foreldrum er heimilt að skipta á milli sín.