Sakar nefndarmenn um vanhæfi vegna tengsla við Garðabæ

Oddviti Á-listans á Álftanesi, Sigurður Magnússon auk Kristínar Fjólu Bergþórsdóttur bæjarfulltrúi Á-listans, hafa lagt fram stjórnsýslukæru til samgöngu- og sveitarstjórnarráðuneytisins vegna eftirlitsnefndar um fjármál sveitarstjórnarmála sem setja á yfir bæjarfélagið.

Að mati Sigurðar þá eru tveir nefndarmenn algjörlega vanhæfir vegna tengsla sinna við Garðabæ. Um er að ræða fyrrum endurskoðanda Garðabæjar, Ólaf Nílsson og Þórð Skúlason sem hefur opinberlega lagt til sameiningu sveitarfélaganna að sögn Sigurðar.

„Þessi nefnd á meðal annars að fara í samningaviðræður við Garðabæ um sameiningu sveitarfélaganna," segir Sigurður en Á-listinn bókaði á fundi bæjarstjórnar Álftaness á dögunum að þessir nefndarmenn væru óhæfir sökum tengsla sinna.

Álftanes berst í bökkum vegna erfiðrar fjárhagsstöðu bæjarfélagsins.

„Þetta er ekki eðlileg stjórnsýsla," segir Sigurður og fullyrðir að þessi aðilar geti ekki að hans mati fjallað um málefni bæjarins á hlutlausan hátt.

Sigurður segist vera tilbúinn að skoða sameiningu sveitarfélaganna en bætir við: „Ef menn vilja ná hagræðingu þá ættu þeir að sameina allt höfuðborgarsvæðið."

Kæruna lagði hann fram í dag en ekki er ljóst hvenær niðurstaða liggur fyrir.