Svíar kanna einnig tengsl milli bólusetningar og drómasýki

Sænska lyfjastofnunin er að athuga hvort samhengi geti verið milli bólusetningar við svínaflensu með bóluefninu Pandemrix og svefnflogum eða drómsýki. Í hádegisfréttum Bylgjunnar kom fram að hætt hafi verið að gefa bóluefnið við svínaflensu tímabundið í Finnlandi eða þar til endanlegar niðurstöður liggja fyrir um tengsl þess við sjúkdóminn.

Tólf tilfelli um svefnflog hafa greinst í Svíþjóð hjá börnum sem bólusett höfðu verið með Pandemrix, að því fram kemur á vef Lyfjastofnunar.

Auk Finnlands hafa tilfelli um svefnflog hafa einnig verið tilkynnt í Noregi, Þýskalandi og Frakklandi. Engin slík tilfelli hafa verð tilkynnt á Íslandi, samkvæmt vef Lyfjastofnunar. Þar segir ennfremur að Lyfjastofnun Evrópu hafi tekið málið til skoðunar.