Innanlandsflugi aflýst fram eftir degi

Bæði Icelandair og Iceland Express flýttu brottförum margra Evrópuvéla í morgun vegna óvissu um flugskilyrði hér og þar yfir meginlandinu. Sumir flugvellir í Bretlandi, Skotlandi, Írlandi og í Hollandi voru lokaðir í morgun, en búið er að opna einhverja þeirra. Flugfélag Íslands hefur aflýst öllu innanlandsflugi fram eftir degi.

Nú er hægviðri og askan dreifist í allar áttir. Samkvæmt upplýsingum Veðurstofunnar gæti Keflavíkurflugvöllur lokast upp úr hádegi og Akureyrar- og Egilsstaðaflugvellir gætu líka lokast í kvöld. Gosórói var með óbreyttum hætti í Eyjafjallajökli í nótt.