Hagsmunasamtök íbúa á Álftanesi stofnuð í dag

Hagsmunasamtök íbúa á Álftanesi verða stofnuð á fundi sem hefst klukkan hálf fimm í dag. Brynja Guðmundsdóttir íbúi í bænum átti hugmyndina að stofnun samtakanna og segir hún að um sé að ræða samtök sem eigi að berjast fyrir framtíð bæjarfélagsins sem gengið hefur í gegnum miklar hremmingar undanfarið.

Brynja segir nokkrar kröfur uppi, íbúar vilji fá að vita hvað gerðist, hvernig sé hægt að setja heilt sveitarfélag á hausinn á eins skömmum tíma og raun bar vitni um. Þá vilja samtökin fá að tala við fulltrúa fjárhaldsstjórnarinnar sem sett hefur verið yfir bæinn.

Þá segir Brynja að meðlimir samtakanna séu orðnir þreyttir á pólitíkinni í bænum og undirstrikar hún að Hagsmunasamtökin séu allsendis ótengd stjórnmálaflokkum. „Við treystum þessum pólitíkusum ekki lengur," segir hún og bendir á að Álftnesingar geti ekki tekið á sig tvöfalldan skell, fyrst frá ríkinu vegna efnahagshrunsins og síðan frá bæjarfélaginu vegna gjaldþrots.

„Við ætlum bara að taka völdin í okkar hendur," segir Brynja sem býst við góðri mætingu enda mikil samstaða á meðal íbúa bæjarins.