Sigurjón nýr formaður Frjálslynda flokksins

Sigurjón Þórðarson, fyrrverandi alþingismaður, var kjörinn formaður Frjálslynda flokksins í dag. Í frétt á vef Frjálslynda flokksins segir að Sigurjón hafi þakkað traustið og farið lofsamlegum orðum um fráfarandi formann, Guðjón Arnar Kristjánsson.

Frjálslyndi flokkurinn var stofnaður fyrir alþingiskosningar árið 1999. Guðjón Arnar Kristjánsson, fráfarandi formaður flokksins sat, á Alþingi frá stofnun flokksins til ársins 2009. Í kosningum það ár missti flokkurinn alla menn af Alþingi. Sigurjón Þórðarson var þingmaður flokksins á árunum 2003-2007.