Sjúkraliðar mótmæla óþolandi vinnuálagi

Fjölmennur fundur sjúkraliða á Landspítala sem haldinn var í BSRB húsinu í gær mótmælti harðlega óþolandi vinnuálagi og undirmönnun á öllum deildum Landspítala háskólasjúkrahúss. Þetta kom fram í ályktun sem samþykkt var á fundinum. Þar segir ennfremur að álagið valdi starfsmönnum óbætanlegu heilsuleysi, kvíða og vaxandi óöryggi í starfi. Forstjóri LSH og landlæknir sátu fundinn.

Ályktun fundarins fer hér á eftir:

Fjölmennur fundur sjúkraliða á Landspítala haldinn mánudaginn 22. mars 2010 vill koma á framfæri við heilbrigðisyfirvöld og stjórnendur sjúkrahússins hörðum mótmælum við óþolandi vinnuálagi og undirmönnun á öllum deildum. Álagið hefur valdið og veldur starfsmönnum óbætanlegu heilsuleysi, kvíða og vaxandi óöryggi í starfi. Jafnframt mótmælir fundurinn ómarkvissum og tilviljunarkenndum ákvörðunum stjórnenda sjúkrahússins til sparnaðar.

Uppsögn sjúkraliða með áratuga reynslu að baki við störf á vökudeild spítalans, án faglegra raka er óréttlætanlegt stéttarlegt ofbeldi sem sjúkraliðar sætta sig ekki við.

Fundur sjúkraliða á Landspítalanum skorar á heilbrigðisráðherra að beita sér fyrir raunhæfum aðgerðum til lausnar á bráðavanda Landspítalans. Ráðherra komi í veg fyrir stéttarlega mismunun og sjái til þess að starfsfólk sjúkrahússins njóti reynslu sinnar