Gagnrýnir ráðningu Sigrúnar sem dagskrárstjóra

Björn Þórir Sigurðsson, markaðsstjóri Morgunblaðsins, gagnrýnir ráðningu Sigrúnar Stefánsdóttur í stöðu dagskrárstjóra Ríkissjónvarpsins. Hann telur að Páll Magnússon, útvarpsstjóri, hefði þess í stað átt að líta til þeirra sem sóttu um stöðuna í mars.

Í dag var greint frá því að Erna Kettler hefði sagt starfi sínu lausu af heilsufarsástæðum en hún var ráðin í lok apríl. Sigrún tekur við starfinu frá og með morgundeginum ásamt því að gegna starfi dagskrárstjóra Ríkisútvarpsins.

37 sóttu um stöðuna í mars. Þar á meðal voru Egill Helgason þáttastjórnandi, Felix Bergsson leikari, Heimir Jónasson fyrrverandi sjónvarpsstjóri Stöðvar 2, Maríanna Friðjónsdóttir, og Þorfinnur Ómarsson fréttamaður.

Heimir vildi ekki sig um málið þegar eftir því var leitað. Í samtali við fréttastofu fyrr í dag sagði Páll að til greina hafi komið að auglýsa stöðuna. Hann hafi aftur á móti talið best fyrir RÚV að fara þessa leið og ráða Sigrúnu.

Ekki úreltar upplýsingar

„Miðað við hversu stutt er síðan að ráðið var í stöðuna hefði verið eðlilegt að farið yrði aftur yfir listann. Það er búið að eyða peningum og tíma fólks í það ferli og grisja þann hóp niður. Capacent hefði getað lagt eitthvað á borðið fyrir Palla því þessar upplýsingar eru auðvitað ekki úreltar en hann hefur eflaust sínar ástæður," segir Björn Þórir. Áður en hann tók til starfa á Morgunblaðinu starfaði hann hjá Skjá einum og Stöð 2.

„Gagnvart þeim sem voru að eyða tíma sínum að sækja um er þetta hálfskrítið," segir Björn Þórir og bendir á að Sigrún hafi ekki verið meðal umsækjenda um stöðuna. Hann telur að ef til vill hefði verið betra að sleppa ráðningarferlinu og „ráða bara beint í stöðuna innan úr stofnuninni í staðinn fyrir að eyða peningum í þetta ferli."