Bjartsýnir á góða veiði hjá Jóni Gnarr

Borgarstjóri Reykvíkinga, Jón Gnarr, mun renna fyrir fyrsta laxinn í Elliðaánum á morgun. Vísir ræddi við reynda veiðimenn sem hafa litlar áhyggjur af því að ekki muni bíta á hjá borgarstjóranum nýja.

"Ég trúi ekki öðru en að Jón setji fljótt í fisk," segir Guðmundur Stefán Maríasson, formaður Stangveiðifélags Reykjavíkur. Guðmundur, sem var staddur á sólarströnd við Miðjarðahafið segist senda Jóni sínar bestu kveðjur. "Ég hefði gjarnan viljað vera með honum á bakkanum en er suður við miðjarðahaf að sóla mig. En hann verður með menn sem eru þaulkunnugir svæðinu sér við hlið og er líka félagi í Stangveiðifélagi Reykjavíkur."

Löng hefð er fyrir því að borgarstjóri renni fyrir fyrsta laxinn í Elliðaánum og er morgundeginum beðið með mikilli eftirvæntingu. Þórólfur Árnason, fyrrverandi borgarstjóri, gefur reyndar lítið fyrir veiðiskapinn. "Ég fékk fisk en þetta átti ekki við mig."

Talsverð umræða hefur verið meðal veiðimanna um hvort eigi að halda veiddum laxi eða sleppa og ruddist tónlistarmaðurinn Bubbi Morthens fram á ritvöllinn og gagnrýndi þjóðþekkta veiðimenn fyrir að setja stórlaxastofninn i hættu.

Þórarinn Sigþórsson, tannlæknir og veiðimaður, var í þeim hópi sem opnaði veiðiskapinn í Blöndu á dögunum. Hann segir stofninn í lítilli hættu og óskar Jóni Gnarr góðs gengis.

"Hann verður með nóg af hjálparkokkum. Hann mun standa við fossbrúnina og veiða með maðki og það eru yfirgnæfandi líkur á að bíti á. Það er gömul hefð að borgarstjóri renni í lax við fossinn sem er fornfrægur veiðistaður en það er ekki á færi nema sérfræðinga að ná laxi þar með flugu."

Þórarinn er spenntur fyrir komandi veiðisumri þó að í fyrsta skipti í ein níu ár muni hann ekki fara í árlega veiðiferð til Rússlands. Spilar þar kreppan sína rullu. "Annars held ég að það verði jafn auðvelt fyrir Jón Gnarr að fá lax í fossinum núna með góðra manna hjálp og að stjórna borginni með hjálp Hönnu Birnu. Hann nýtur góðrar leiðsagnar í báðum tilvikum."