Forystumenn bankanna kallaðir á fund vegna bónuskerfa

Lilja Mósesdóttir, þingmaður VG og formaður viðskiptanefndar, ætlar að boða fulltrúa bankanna á fund viðskiptanefndar til að ræða hugmyndir um bónusgreiðslur til bankastarfsmanna. Lilja sagði á þingfundi í dag að ótímabært væri að innleiða slíkt kerfi á nýjan leik.

„Sérstaklega þar sem bónuskerfið sem var við lýði fyrir bankahrun leiddi til þess að margir bankastarfsmenn freistuðust til þess að setja eigin hagsmuni ofar almannahagsmunum og ráðlögðu fólki meðal annars að taka gengistryggð lán þrátt fyrir áhættuna sem því fylgir," sagði Lilja.