Fjölbreytt popp á boðstólum

Í kvöld er annar skammtur af þremur í undankeppni Söngvakeppninnar. Síðast komust ballaðan sem Íris Hólm söng og kántrírokklagið sem Matti Matt flutti áfram. Tvö af lögunum fimm í kvöld munu elta þessi lög í aðalkeppnina 6. febrúar eftir símakosninguna.

Tvö lög eru flutt á íslensku af hljómsveitum, þrjú á ensku af söngvurum. Hljómsveitin Menn ársins flytur „Gefst ekki upp“, sem er stílað inn á að efla baráttuþrek landans í kreppunni. Þetta er kraftballaða eftir Harald Vigni Sveinbjörnsson og textann gerði Sváfnir Sigurðarson.

Hvanndalsbræður frá Norðurlandi koma með fyrsta „flipplag“ keppninnar í ár, „Gleði og glens“. Stofnandi sveitarinnar, Rögnvaldur „gáfaði“ Rögnvaldsson, samdi lag og texta. Hann hætti í sveitinni í fyrra en hefur ekki getað slitið sig frá stuðinu síðan. Selur stundum miða á böllum og ætlar að syngja bakraddir í kvöld ásamt spurningaljóninu Guðmundi Svafarssyni úr Ljótu hálfvitunum. Lagið er hresst popp sem sveiflast frá því að minna á Green Day og Papana.

Þá er það enskan. Samstarf Bubba Morthens og Óskars Páls hefur vakið athygli, enda hefur Bubbi ekki verið ýkja hrifinn af Eurovision fyrr en nú. Það er Færeyingurinn Jógvan Hanson sem flytur lag þeirra og texta, „One More Day“. Lagið ber keim af músík Bubba í gegnum árin, sérstaklega viðlagið, en erindið ber nett áhrif frá R.E.M. Melódían er sterk, en lagið er þó ekki sérlega „Eurovision“-legt og því getur brugðið til beggja vona með afdrif þess í keppninni.

Lagið „Now and Forever“ er eftir Albert Guðmann Jónsson, sem áður hefur tekið þátt í Eurovision, síðast í fyrra með lagi sem eiginkona hans, Kaja, söng. Albert var í hljómsveitinni Kung fú í fimm ár en er nú í hljómsveitinni Íslenska sveitin. Lagið er kraftballaða með nokkuð óvæntum hljómgangi og Edgar Smári Atlason syngur það af festu. Hann hefur sem kunnugt er sungið víða síðustu árin og var í úrslitum í síðustu Söngvakeppni með lagið „The Kiss We never Kissed“.

Eina konan í kvöld er Sigrún Vala Baldursdóttir, sem syngur lag Halldórs Guðjónssonar, „I Believe in Angels“. Sigrún Vala er ung söngkona af Suðurlandi og stundar nám við Tónlistarskóla FÍH. Halldór er mikill keppnismaður í tónlistinni og átta lög eftir hann hafa komist í úrslit Ljósalagskeppni Reykjanesbæjar. Hann vann þá keppni í fyrra og árið 2005. Halldór átti lag í Söngvakeppninni í fyrra sem komst ekki í úrslit.

Á síðasta undankvöldinu eftir viku reyna svo með sér söngvararnir Arnar Jónsson, Sigurjón Brink, Steinarr Logi Nesheim, Anna Hlín og Hera Björk.

drgunni@frettabladid.is