Hundruð stúlkna koma til Íslands til að dansa á nektarstöðum

Hundruð ungra erlendra stúlkna koma til Íslands á hverju ári til þess að dansa á nektardansstöðum. Lögregluyfirvöldum hefur reynst mjög erfitt að kanna stöðu þeirra, aðstæður og ástæður fyrir því að þær stundi þessa iðju eða hvort þær séu þvingaðar til þess. Þetta kemur fram í meirihlutaáliti allsherjarnefndar Alþingis um bann við nektarsýningum sem birt var í dag.

Allsherjarnefnd leggst gegn þvi að áfram verði veitt undanþága frá banni við nektarsýningum á veitingastöðum. Telur nefndin engin málefnaleg rök fyrir því að undanþágunni verði viðhaldið. Í nefndarálitinu kemur fram að rannsóknir yfirvalda víða í Evrópu hafi sýnt fram á að stúlkur sem vinni á slíkum stöðum séu almennt mjög ungar, en þó yfir lögaldri. Þær séu þolendur misneytingar af ýmsu tagi, svo sem vegna fátæktar og áfengis- og eða eiturlyfjafíknar. Í mörgum tilvikum séu þær fórnarlömb mansals eða annarra glæpa. Ástæða hafi verið til þess að ætla að stúlkur sem hafi starfað á slíkum stöðum hér á landi hafi verið fórnarlömb mansals.

Allsherjarnefnd Alþingis leggur því til að frumvarp sem felur í sér að nektarsýningar verði bannaðar 1. júlí næstkomandi verði samþykkt.