Þjóðaratkvæðagreiðslan hefur styrkt samningsstöðu Íslands

Fyrirhuguð þjóðaratkvæðagreiðsla um Icesave hefur styrkt samningsstöðu Íslands að mati formanns Sjálfstæðisflokks.

Þjóðaratkvæðagreiðslan um Icesave á að fara fram laugardaginn eftir viku. Forsætisráðherra hefur lýst því yfir að réttast væri að aflýsa atkvæðagreiðslunni náist nýtt samkomulag við Breta og Hollendinga í millitíðinni.

Bjarni vill ekki úttala sig um hvað gerist ef nýtt samkomulag næst við Breta og Hollendinga á næstu dögum. „Auðvitað eigum við að meta stöðuna ef það gerist á næstu dögum en mér finnst það ólíklegt," segir Bjarni Benediktsson, formaður Sjálfstæðisflokksins.

Bjarni telur að þjóðaratkvæðagreiðslan hafi styrkt samningsstöðu Íslands í Icesave málinu. „Ég held að það sé engum blöðum um það að flétta að það hefur mótað samningsstöðu okkar. Það hefur legið fyrir að þjóðin væri á öndverðum meiði við ríkisstjórnina í málinu og það hefur gefið okkur mikinn styrk."