Ábendingar almennings hafa áhrif á viðræðurnar

Á fjórða hundrað hugmynda hafa borist frá almenningi inn á vefsíðuna Betrireykjavik.is sem Samfylkingin og Besti flokkurinn stofnuðu vegna meirihlutaviðræðna í borgarstjórn. Einar Örn Benediktsson segir að Besti flokkurinn ætli ekki að flýta sér.

Á vefnum eru nú 328 hugmyndir frá almenningi en þær hugmyndir og ábendingar sem hafa borist frá kjósendum eru þegar farnar að hafa áhrif á viðræður flokkanna.

Einar Örn Benediktsson, nýkjörinn borgarfulltrúi Besta flokksins, segir að flokkurinn vilji vanda sig í viðræðum við Samfylkinguna og taka ábyrga afstöðu til þess sem er í boði.

„Okkur langar bara að koma ákveðnum málefnum fram og til dæmis fyrir þá sem minna mega sín. Okkur liggur ekkert á," segir Einar Örn og bætir við að fljótræði hafi einkennt síðustu ár. „Við viljum vanda okkur. Ég hef tekið upp plötur sem hafa tekið þrjá til sex mánuði í upptökum en það er til þess að gera gott verk og það er það sem við erum að gera.“