Brá þegar að hún heyrði um áform forsætisráðherra

Formaður BSRB segir að sér hafi brugðið í gær þegar að hún heyrði áform forsætisráðherra um að sameina 80 ríkisstofnanir. Á flokksstjórnarfundi Samfylkingarinnar í gær sagðist Jóhanna Sigurðardóttir, forsætisráðherra, telja raunhæft að skera niður og sameina allt að 80 ríkisstofnanir á næstu tveimur til þremur árum.

„Fyrstu viðbrögð frá mér voru þau að ég var undrandi vegna þessa fjölda stofnana. En ég hlýt að horfa til þess að aðalmarkmiðið hljóti að vera það að standa vörð um grunnþjónustuna," segir Elín Björg Jónsdóttir, formaður BSRB.

Hún segist þess vegna gera ráð fyrir að menn séu að reyna að sameina stofnanir til þess að hafa fjármagn til þess að setja í velferðarþjónustuna. „Að það sé hægt að ná hagræðingu og aukinni skilvirkni til að halda uppi grunnþjónustu," segir Elín Björg.

Elín óttast ekki að þessar breytingar muni þýða umfangsmiklar uppsagnir félagsmanna BSRB. „Það þarf auðvitað starfsfólk til að halda uppi grunnþjónustunni," segir Elín og bendir á að það séu félagsmenn BSRB sem veiti þessa grunnþjónustu.