Ástarlíf blómstrar í fiskasafninu í Eyjum

Ástarlíf blómstrar nú í fiskasafninu í Vestmannaeyjum af engu minni krafti en á góðri þjóðhátíð í Herjólfsdal.

Aðdragandinn er að skipverjar á loðnuskipinu Sighvati Bjarnasyni komu færandi hendi með mörg hundruð kíló af lifandi loðnu til safnsins um helgina og unir hún hag sínum svo vel í nýju umhverfi að hún er farin að sinna kalli náttúrunnar um að fjölga sér. Tvö og tvö taka þau sig saman, hængur og hrygna, grafa saman rauf í sandinn í botninum og blanda þar saman hrognum og sviljum, sem verða að litlum loðnuseiðum, ef allt gengur eftir. Þannig klak hefur áður tekist í safninu, fyrir nokkrum árum.

Og það gætu fleiri tíðindi verið í uppsiglingu í Fiskasafninu í Eyjum, því nýverið færðu sjómenn því þrjá rauðmaga og þrjár grásleppur, en nú styttist í hrygningartíma hjá þeim líka.