Aftakaveður í nótt - 50 metrar á sekúndu

Aftakaveður var í Mýrdal í gærkvöldi og fram á nótt. Þakplötur fuku af húsum á þremur bæjum og var björgunarsveitin Víkverji kölluð út til aðstoðar við mjög erfiðar aðstæður.

Gámur fauk á hliðina í Vík, en björgunarmönnum tókst að hemja hann. Vindur fór allt upp undir 50 metra á sekúndu í hviðum á þessum slóðum og sömuleiðis undir Eyjafjöllum.

Lögreglan í Reykjavík fékk sjö foktilkynnngar í nótt, en það var hvergi það alvarlegt að kalla þyrfti út björgunarmenn. Fá skip eru á sjó, og þá aðeins stór skip. Ekki er vitað til að neitt þeirra hafi orðið fyrir áföllum.