Foreldrar uggandi yfir niðurskurði

„Foreldrar eiga að hafa eitthvað að segja um hvar skorið er niður í skólum barna þeirra," segir Guðrún Valdimarsdóttir framkvæmdastjóri Samfok, Samtaka foreldra grunnskólabarna í Reykjavík. Samfok sendi frá sér fréttatilkynningu í gær þar sem ítrekað er mikilvægi þess að haft sé samráð við skólaráð þegar ákvarðanir eru teknar um niðurskurð í skólum.

Menntasviði Reykjavíkur er gert að skera niður um fjögur prósent í ár. Guðrún segir foreldra uggandi um hvar verður borið niður, reyndar megi ekki skera niður í almennri kennslu, sérkennslu eða nýbúakennslu. En leiðir sem gætu orðið fyrir valinu séu til dæmis tækjakaup, gæsla í frímínútum eða skólaferðir.

Samfok harma að skera þurfi niður í menntakerfinu og bendir Guðrún á að þetta sé annað árið í röð sem skorið er niður þar og svigrúmið því ekki mikið. „En fyrst að skera þarf niður þá er mjög mikilvægt að foreldrar séu með í ráðum, þeir fái að láta sínar skoðanir í ljós og skólastjórnendur upplýsi um rök fyrir sínum tillögum," segir Guðrún.

Samkvæmt lögum um grunnskóla ber að hafa samráð við skólaráð um allar ákvarðanir er snerta skólastarf, þar með talið rekstraráætlanir. Í skólaráði sitja tveir fulltrúar foreldra, auk skólastjórnenda, fulltrúa nemenda og fulltrúa nærsamfélagsins. -sbt