Hollvinir harma niðurskurð

Stjórn Hollvina Ríkisútvarpsins harmar þann gríðarlega niðurskurð sem nú hefur dunið á Ríkisútvarpinu, í þriðja sinn á skömmum tíma, vegna þeirrar ákvörðunar Alþingis að klípa tíunda hluta af útvarpsgsjaldi því sem er undirstaða tekna RÚV.

Í ályktun frá samtökunum segir að vegna þessa hafi nú um 50 starfsmenn Ríkisútvarpsins misst vinnuna, þar á meðal margir af reyndustu dagskrárgerðar- og fréttamönnum þess. „Sérstaklega varhugavert er að mörgum af elstu og reyndustu starfsmönnum RÚV hefur verið sagt upp og með þeim hverfur óhemjumikil og dýrmæt reynsla. Einnig hefur þjónusta við landsmenn utan höfuðborgarsvæðisins verið skert verulega með því að svæðisstöðvar útvarpsins eru meira og minna lamaðar vegna uppsagna," segir ennfremur um leið og fullyrt er að sjaldan hafi verið jafnmikil þörf fyrir að haldið yrði úti „öflugu almannaútvarpi, áreiðanlegri fréttaþjónustu og umfjöllun um framvindu mála og á þessum örlagaríku tímum í sögu þjóðarinnar."

Hollvinir segjast hafa fullan skilning á því að draga þurfi saman í starfsemi RÚV eins og annars staðar í þjóðafélaginu eftir efnahagshrunið í fyrrahaust. „En við teljum að hér hafi verið allt of langt gengið í vanhugsuðum niðurskurði og ekki hafi verið reynt að gæta þess að verja meginhlutverk RÚV . Við hörmum ennfremur þann blóðuga niðurskurð á fjárveitingum til innlendrar kvikmyndagerðar, sem kunnugir fullyrða að muni ganga af þeirri grein dauðri."

„Eitt allra mikilvægasta verkefni Ríkisútvarpsins er að efla innlenda dagskrárgerð. En ekki verður annað séð en niðurskurðarhnífnum sé einmitt beitt af hvað mestri hörku á þann þátt í starfsemi þess, hvort sem litið er til uppsagna dagskrárgerðarfólks útvarps og sjónvarps, eða framlaga RÚV til innlendrar kvikmyndagerðar," segir að lokum, en undir ályktunina ritar Þorgrímur Gestsson.