Segir aukna hörku í íslensku nefndinni

„Við erum ekki að reyna að hagnast á þessu,“ sagði Jann Kees de Jager, fjármálaráðherra í bráðabirgðastjórn Hollands, um samningaviðræður við Íslendinga um Icesave-deiluna. „Við erum núna aðeins að skoða fjármögnunarkostnaðinn.“ Fjármálanefnd hollenska þingsins yfirheyrði hann í tvo og hálfan tíma um málið í gær.

Hann vildi ekki fara út í smá-atriði um fjármögnunarkostnað, en virtist greinilega orðinn pirraður á stöðu mála. „Það er ekki erfitt að reikna út fjármagnskostnaðinn, en þeir voru með miklu lægri tölu en við. Ég held að okkar fólk viti miklu meira um það en nokkrir amerískir bankamenn sem Íslendingar hafa ráðið til sín,“ sagði hann, og á þar væntanlega við Bandaríkjamanninn Lee Buchheit, formann nefndarinnar, og Kanadamanninn Don Johnston sem hefur verið nefndinni til ráðgjafar.

Hann sagðist þó hafa rætt við Steingrím J. Sigfússon fjármálaráðherra í vikunni. „Enginn er að hnykla vöðvana eða sýna hörku. Við skiljum afstöðu hvor annars. Þeir viðurkenna að peningana þurfi að endurgreiða.“

Steingrímur J. Sigfússon fjármálaráðherra segir í viðtali við Fréttablaðið að menn hafi notað tímann frá þjóðaratkvæðagreiðslu til að fara aftur yfir stöðuna. Fyrirfram hafi menn ekki talið raunhæft að funda í þessari viku, en vonast sé til að af fundum geti orðið eftir helgi.

Í yfirheyrslunum kom fram að mikill ágreiningur er meðal hollenskra stjórnmálaflokka um það hvort beita eigi Íslendinga þrýstingi á vettvangi Alþjóðagjaldeyrissjóðsins eða Evrópusambandsins. De Jager tók illa í kröfur frá Frelsisflokknum, hægri flokki hins umdeilda þingmanns Geerts Wilder, um slíkan þrýsting: „Það virðist ekki vera vænleg leið til að ná góðum samningi við Ísland.“

Reiknað er með hægrisveiflu í þingkosningunum í júní, en þá komast til valda flokkar sem vilja síður gefa eftir í samningum við Íslendinga.

Fram kom í yfirheyrslum þingnefndarinnar að samningatækni Íslendinga hefur harðnað með aðkomu bandarískra lögfræðinga.

„Íslendingar þurfa nú að koma aftur með tillögu,“ sagði de Jager um framhald viðræðnanna. „Ég get ekki séð hvernig við getum gert mikið betur en að minnka þetta niður í fjármagnskostnaðinn einan.“

gudsteinn@frettabladid.is