Óljós örlög manns sem barnaði ekkju í Afganistan

Óvíst er hver verða örlög manns sem barnaði 47 ára gamla ekkju í Badhgis héraði í Afganistan. Talibanar myrtu ekkjuna sjálfa um helgina.

Konan hét Sanam Gul og hafði verið ekkja í fjögur ár. Þegar komst upp um þungun hennar var hún ákærð og dæmd til dauða fyrir kynlíf utan hjónabands.

CNN fréttastofan hefur eftir héraðsstjóra Badgis að fyrst hafi Gul verið húðstrýkt og svo skaut foringi talibana hana í höfuðið.

Fyrstu fréttir af þessu hermdu að barnsfaðir hennar hefði komist undan. Það var ekki rétt.

Hann var pískaður 200 sinnum og er í haldi talibana. Óvíst er hvort sú refsing verður látin nægja eða hvort hann verður einnig myrtur.