Þjóðin kjósi um breytingar á kvótakerfinu

Steingrímur J. Sigfússon, fjármálaráðherra, segir að til greina komi að leggja breytingar á kvótakerfinu í dóm þjóðarinnar í sérstakri þjóðaratkvæðagreiðslu. Ekki sé gott að bullandi ágreiningur sé meðal þjóðarinnar um sjávarútvegskerfið.

„Það gýs upp í öllum alþingiskosningum mikil og megn óánægja með ákveðna þætti þessa kerfis. Markmiðið er að reyna að koma mönnum að borði í viðræður um að skoða þetta og leita leiða til að ná betri sátt um fyrirkomulag þessa mála," sagði Steingrímur í Bítinu á Bylgjunni í morgun.

Aðspurður um hvort hann telji að þjóðin eigi að kjósa um breytingar á kvótakerfinu sagði Steingrímur: „Það getur vel komið til þess ef að einhverjir skýrir valkostir milli leiða væru í boði og hægt væri að kjósa um. Þetta er stórt og mikið mál. Þetta er grundvallarmál. Ég held að það sé miklu auðveldara að ná sátt um þetta en menn telja ef menn fást til að setjast í alvöru niður."

Þá kom fram í máli Steingríms að enn sé uppi á borðum hugmyndir um að festa þriðjung kvótans í byggðarlögunum. Annar þriðjungur væri á markaði. „Slíkt kerfi held ég að myndi leita jafnvægis á góðum forsendum," sagði Steingrímur.

Hægt er að hlusta á viðtalið hér.