Dóttir Sophiu Hansen bar vitni á tyrknesku

Dóttir Sophiu Hansen, Rúna Hansen, bar vitni símleiðis í Héraðsdómi Reykjavíkur í morgun en móðir hennar, Sophia, hefur verið ákærð fyrir að bera Sigurð Pétur Harðarson röngum sökum.

Deilt er um undirskrift á þremur viðskiptabréfum sem Sophia taldi nafn sitt falsað á. Fól hún lögfræðingi sínum að kæra málið til lögreglu árið 2007.

Í vitnaskýrslu hjá lögreglunni lýsti hún því yfir að hana grunaði að Sigurður Pétur hefði falsað nafnið hennar sem á að hafa leitt til þess að hann var ranglega sakaður um skjalafals. Samtals nam upphæð viðskiptabréfanna rétt rúmum 42 milljónum króna.

Hann var hinsvegar hreinsaður sökum þar sem rannsókna sænskra rithandasérfræðinga leiddi í ljós að sennilega skrifaði Sophia sjálf undir viðskiptabréfin.

Þess vegna var Rúna kölluð fyrir dómstól í dag en hún er skráður sem vottur á bréfunum. Sjálf neitaði Rúna því að hún væri vottur á bréfunum en framburður hennar fór allur fram á tyrknesku þar sem hún talar ekki íslensku. Sjálf hefur hún ekki komið til Íslands í tuttugu ár eftir að faðir hennar Halim Al nam hana og systur hennar Dagbjörtu á brott snemma á tíunda áratugnum.

Sigurður Pétur bar einnig vitni í héraðsdómi í morgun. Hann sagðist hafa hitt Rúnu og eiginmann hennar auk barna í Tyrklandi árið 2005 með Sophiu. Hefðu þau öll farið út að borða saman en í sömu ferð á Rúna að hafa undirritað bréfin sem vottur.

Sjálf neitaði Rúna þessu og sagðist ekki hafa hitt Sigurð Pétur síðan hún var lítil stúlka. Í dag er Rúna rétt tæplega þrítug.

Rithandasérfræðingur var einnig kallaður fyrir dómara. Hann sagði að það væri meira en líklegt að Sophia hefði skrifað sjálf undir bréfin. Mælikvarðinn eru fjögur stig í plús eftir því sem það þykir líklegra að rithöndin sé viðkomandi og svo fjögur stig í mínus eftir því sem það þykir ólíklegra að viðkomandi eigi rithöndina.

Rithandasérfræðingur sagði að líkurnar á því að undirskriftin væri Sophiu væru plús þrír.

Aðalmeðferð málsins heldur áfram í dag. Síðan verður málið lagt fyrir dóm og má búast við dómsuppsögu innan þriggja vikna.