Vík í Mýrdal eins og draugabær í gærdag

Vík í Mýrdal var eins og draugabær yfir að líta í gær vegna mikils öskufalls frá sprengigosinu í Eyjafjallajökli. Svifryksmælingar í Vík og nágrenni fóru langt yfir heilsuverndarmörk og Rauði krossinn opnaði fjöldahjálparstöðvar í Vík og á Kirkjubæjarklaustri síðdegis vegna þessa.

Lýsingar heimafólks eru til vitnis um það að öskufallið hafi verið „óþolandi klukkustundum saman“ og um sjötíu manns leituðu athvarfs í fjöldahjálparstöðinni í Vík. Margir þeirra létu vita að þeir ætluðu ekki að vera á heimilum sínum yfir nóttina, segir Víðir Reynisson, hjá Almannavörnum.

„Þetta eru rétt viðbrögð og mjög skiljanlegt að fólk, sérstaklega barnafólk og eldra fólk, fari meðan á þessu stendur. Fyrir marga er ekki um neitt annað að ræða en að fara.“

Víðir segir að öskufallið hafi náð frá Þorvaldseyri í vestri allt austur á Mýrdalssand, um sextíu kílómetra frá gosstöðvunum. Erfitt sé þó að átta sig á hvað er öskufall og svo aska að fjúka.

Elísabet Ólafsdóttir, sem býr við Hátún í Vík, segir ástandið óþolandi og að hún hafi ekkert farið út fyrir hússins dyr. „Þetta er ógeðslegt. Það er öskulag hér yfir öllu og maður er að verða hálfvitlaus á því að hafa ekki ferskt loft,“ segir Elísabet, sem er áttræð.

Berglind Guðmundsdóttir, íbúi við Bakkabraut, ákvað í gær að fara frá Vík og vera hjá vinafólki í Reykjavík. Litli sonur hennar, Guðmundur Atlas, verður hjá afa sínum og ömmu á Laugarvatni. „Hann tekur þessu vel og finnst það hálfgert sport að vera með grímuna sína.“ Berglind hefur ekki ákveðið hvenær hún fer heim; um það hafi Eyjafjallajökull mest að segja. Margt af hennar fólki var farið frá Vík seinni partinn í gær.

Björn Oddsson jarðeðlisfræðingur segir að gosmökkurinn hafi risið hæst um sjö kílómetra og stefndi þá í suðaustur. Ekki sé aukinn styrkur í gosinu þótt það sé kannski tilfinning þeirra sem búa á öskufallssvæðinu. Reyndar hafi sprengivirkni líklegast minnkað frá því deginum áður. Gígur hleðst áfram upp í kringum gosopið í ískatlinum og hraunstraumurinn til norðurs er á svipuðum slóðum og undanfarna daga.

svavar@frettabladid.is