Landsvirkjun kemur af fjöllum og segir skilyrði uppfyllt á Kárahnjúkum

Landsvirkjun vísar því á bug að ekki hafi verið staðið við öll skilyrði varðandi Kárahnjúkavirkjun en eins og greint var frá í dag hefur umhverfisráðherra ákveðið að láta kanna það. Ráðherra sagðist í daga hafa fengið ábendingar um að skilyrði í úrskurði ráðherra um mat á umhverfisáhrifum Kárahnjúkavirkjunar hafi ekki verið uppfyllt og því hefur Umhverfisstofnun verið falið að kanna málið.

„Í tilefni af þessu er rétt að upplýsa að Landsvirkjun telur sig í einu og öllu hafa uppfyllt nefnd skilyrði frá upphafi framkvæmda," segir í tilkynningu frá Landsvirkjun. „Í því sambandi er rétt að benda á að frá árinu 2003 hefur starfað sérstök eftirlitsnefnd til að fylgjast með þessu og sitja í henni fulltrúar sveitarfélaga á svæðinu sem gáfu út framkvæmdaleyfi fyrir Kárahnjúkavirkjun, svo og fulltrúi iðnaðarráðherra, sem gaf út virkjunarleyfi og fulltrúi umhverfisráðherra."

Þá er ennfremur bent á að Landsvirkjun hafi reglulega gefið nefnd þessari skýrslu um það hvernig skilyrðin hafa verið uppfyllt. „Fyrirtækið vinnur nú að lokaskýrslu um málið sem reiknað er með að verði tilbúin um miðjan apríl."

Að lokum kemur fram að Landsvirkjun hafa engar ábendingar eða athugasemdir borist sem benda til þess að skilyrðin hafi ekki verið uppfyllt. „Landsvirkjun mun að sjálfsögðu upplýsa Umhverfisstofnun og umhverfisráðuneytið um málið ef eftir því verður leitað. Finnist eitthvað athugavert mun fyrirtækið bæta þar úr."