Hraunið ekki á hraðferð í Þórsmörk

Fyrstu dagana skreið hraunið hratt niður Hrunagil og vísindamenn töldu að með sama hraða næði það niður að Krossá á fáum dögum. Hrauntungan í gilinu hefur hins vegar ekkert bifast áfram frá því fyrir helgi en þar er hún rétt rúmlega hálfnað á leið sinni niður í Þórsmörk.

Skoðum betur með grafíkmynd hversu langt hraunið er komið niður Hrunagil en það sem stöðvaði framrás þess þar var að hraunrásirnar færðu sig yfir í Hvannárgil með nýjum hraunfossum þar. Hrauneðjurnar frá gígnum hafa þá tilhneigingu að staflast upp og stíflast og þá leitar hraunið í nýjan farveg. Þannig hafa hraunfossarnir ítrekað víxlast milli giljanna og nýjar hraunspýjur renna ofan á þeim eldri, eins og þessi ljósmynd Magnúsar Tuma Guðmundssonar sýnir glöggt.

Á Jarðvísindastofnun Háskóla Íslands fylgist Eyjólfur Magnússon með framrás hraunsins en hann treysir sér ekki til að spá því hvort það muni bara hlaðast upp inni í giljunum eða ná niður á sléttlendið í Þórsmörk.